Ongi etorri Legegunea atarira

1. Segurtasun Sailak eta Polizia eta Larrialdietako Euskal Akademia organismo autonomoak (aurrerantzean, arau honen ondorioetarako, «administrazio hau») konpromiso irmoa hartzen dute ez onartzeko inolako indarkeria-motarik beren antolakundeetan, bereziki sexu-jazarpentzat eta sexuan oinarritutako jazarpentzat har daitekeen jokabideak, eta adierazten dute, halakorik badago, zehapenak jarriko dituztela dagokion araudian xedatutakoaren arabera.

2. Administrazio honek konpromisoa hartzen du langileen duintasuna eta aniztasuna errespetatzeko lan egiteko, eta haien osasuna eta emakumeen eta gizonen berdintasunaren printzipioa babesteko; horrez gainera, erakunde-kultura jakin bat sustatu eta zainduko du, ahalbidetuko duena identifikatzea eta gaitzestea errespeturako eskubidearen eta diskriminaziorik ez izateko eskubidearen kontra doan jokabide oro.

1. Aurrez adierazitakoaren arabera, administrazio honek konpromiso hauek hartzen ditu:

   1. Errespetuan eta zuzentasunean oinarritutako eta indarkeriarik gabeko lan-ingurune segurua sustatzea. Lan-harremanen eremuan egiten diren indarkeriako eta diskriminazio sexistako jokabideak irmoki baztertuko ditu esaera eta jokamolde laidogarriak, umiliagarriak edo larderiazkoak erabiltzea barne eta dagozkion zehapenak ezarriko ditu. Horretarako, administrazio honetako organo eta zuzendaritzako langile guztiek mota horretako jokabideak prebenitzeko eta zehatzeko eskura dituzten baliabideak erabiliko dituzte.

   2. Beharrezkoak diren neurriak izatea eta jartzea, halako jokabide onartezinak irmotasunez eta ezbairik gabe prebenitzeko eta haien gainean esku hartzeko, helburua baita egoera horiek berriro ez gertatzea eta langile orok halakoak detektatzea eta arbuiatzea. Administrazio honek, Berdintasunerako Batzorde Iraunkorrari jakinaraziko dizkion ekintzen bidez, prebentzio-neurriak hartuko ditu, langile guztien informazioan, sentsibilizazioan eta prestakuntzan eragiteko.

   3. Langileei, Administrazioan sartzen diren unetik bertatik, balio hauek barneratzen laguntzeko ekintzak planifikatzea eta garatzea: tratu-berdintasuna, errespetua, duintasuna, nortasunaren garapen askea eta sexu-jazarpeneko edo sexuan oinarritutako jazarpeneko jokabideen arbuioa. Ezin da alde batera utzi administrazio honetan lan egiten duten pertsona guztien erantzukizuna dela sexu-jazarpena eta sexuan oinarritutako jazarpena prebenitzen eta haren gainean esku hartzen laguntzea, bai jarduketa-prozedura honen eremuan, bai arlo horri dagokionez har daitezkeen bestelako neurrien eremuan.

   4. Jarduketa-prozedura aplika dadila eskatzen duen orori laguntzea Jarduketa-prozedura publikoa eta eskuragarria izango da, eta bermatzea betetzen direla errespetuaren, konfidentzialtasunaren eta eskubide-babesaren printzipioak, hala alderdi inplikatuenak, nola prozesuan parte hartzen duten pertsonenak, eta haien ongizatea zaintzea beti.

   5. Arreta ipintzea jazarpena sufritu duen pertsonak inolako penalizaziorik edo birbiktimizaziorik jasan ez dezan, eta bi alderdiei eta jarduketa-prozedura aktibatzen eta aplikatzen lagundu duten pertsonei bestelako kalteak sortzea eragotziko du, bai aholkularitza konfidentzialaren fasean, bai ikerketa-fasean.

   6. Berdintasunerako Batzorde Teknikoaren bidez, prozeduraren aplikazioaren jarraipena eta aldizkako ebaluazioa egitea, eta arlo horretan prebentzio gisa planifikatzen diren gainerako ekintzak burutzea.

   7. Barneko lana egiteaz gain, koordinatuta lan egitea beste eragile batzuekin, zerbitzu-hartzaileekin eta kanpoko administrazioekin, bere eragin-eremu guztietan estereotipoei eta desberdinkeria-faktoreei aurre egiteko.

2. Bestalde, langileen legezko ordezkaritzak laneko sexu-jazarpena eta sexuan oinarritutako jazarpena prebenitzen eta detektatzen lagunduko du, eta, horretarako, zera egingo du: langileak sentsibilizatu; Segurtasun Saileko Berdintasunerako Batzorde Iraunkorrean aktiboki parte hartu, eta, jazarpen-mota hori bultza dezaketen jokabideak gertatzen ari direla jakinez gero, haien berri eman Berdintasunerako Batzorde Iraunkorrari, Laneko Segurtasun eta Osasun Batzordeari eta kasuaren arabera egoki diren zuzendaritza-organoei.

1. Arau honen xedea da ezartzea zer prebentzio-neurri eta prozeduraren arabera jardungo den sexu-jazarpeneko eta sexuan oinarritutako jazarpeneko kasu izan daitezkeen jokabideen aurrean, administrazio honen lan-eremuan lan-kontratudun langileen artean gertatzen direnean, eta zehazki:

   1. Langileei jarraibideak ematea, gai izan daitezen lan-eremuko sexu-jazarpena eta sexuan oinarritutako jazarpena identifikatzeko eta ezagutzeko.

   2. Esku-hartze goiztiarra bultzatuko duten mekanismoak ezartzea eta jarduketa-prozedura bizkorra, argia eta laburra izatea, zeren eta horrek guztiak bermatuko baititu ukitutako pertsonen segurtasuna, dagozkion babes-neurrien aplikazioa eta, hala badagokio, zehapen-prozedurak abiaraztea.

   3. Administrazio honetan agindu hau aplikatzeko eskumena duten giza baliabideak nola antolatuko diren zehaztea.

2. Agindu honetan jasotako prozeduraren azken helburua da administrazio honetako langileen duintasuna eta osasuna babestea, bai eta administrazioaren eremuan gerta daitekeen indarkeria-mota oro desagerrarazten laguntzea ere. Ondorioz, beharrezkoak diren neurriak hartuko ditu Administrazioak, halako jokabideak prebenitu, detektatu eta zuzentzeko, asmoa baita lan-osasuna babesteko hartua duen konpromisoa gauzatu eta tratu- eta aukera-berdintasunaren printzipioa benetan aplikatzea.

Agindu honen ondorioetarako, definizio hauek hartuko dira kontuan:

1. Sexu-jazarpena: izaera sexualeko portaera oro, hitzezkoa zein fisikoa edozein dela ere haren iraupena edo aldizkakotasuna, zeinaren asmoa edo ondorioa baita pertsonaren duintasunari erasotzea, bereziki larderiazkoa, apalgarria edo iraingarria den ingurunea sortzen denean. Definizio horrekin bat datozen beste jokabide batzuk alde batera utzi gabe, sexu-jazarpentzat joko dira beti I. eranskineko A letran jasota daudenak.

2. Sexuan oinarritutako jazarpena: pertsona baten sexuaren arabera izandako portaera oro edozein dela ere haren iraupena edo aldizkakotasuna, zeinaren asmoa edo ondorioa baita pertsonaren duintasunari erasotzea eta larderiazkoa, apalgarria edo iraingarria den ingurunea sortzea. Definizio horrekin bat datozen beste jokabide batzuk alde batera utzi gabe, sexuan oinarritutako jazarpentzat joko dira beti I. eranskineko B letran jasota daudenak.

1. Lan-eremuan egindako jokabidetzat hartuko dira leku hauetan egindakoak:

   1. Administrazio honen lantokiak; edo

   2. Inplikatutako pertsonak dauden beste edozein leku, baldin eta administrazio honen zerbitzura lan egiteagatik badaude han.

2. Orobat, lan-eremuan egindakotzat joko dira, nahiz eta aurreko apartatuetan adierazitako lekuetatik kanpo gertatu, administrazio honek bere langileei zeregin profesionalak betetzeko emandako baliabide edo gailu elektronikoen bidez egiten diren jokabideak.

1. Hauei aplikatuko zaie araua: administrazio honetako lan-kontratudun langile guztiei, baldin eta sexu-jazarpentzat edo sexuan oinarritutako jazarpentzat har daitezkeen egoeretan badaude eta egoera horiek administrazio honen lan-eremuaren barruan gertatzen badira, 4. eta 5. artikuluetako definizioen arabera.

2. Halaber, Prebentzio eta Lan Osasuneko Alorrak agindu hau aplikatuko du, oro har eta lehentasunez, administrazio honen mendeko langileak eta kanpoko enpresa, entitate edo administrazioetako langileak inplikatuta dauden sexu-jazarpeneko edo sexuan oinarritutako jazarpen izan daitezkeen kasuetan. Hori guztia alde batera utzi gabe administrazio honek, Laneko Arriskuen Prebentzioari buruzko azaroaren 8ko 31/1995 Legearen 24. artikuluan xedatutakoaren arabera, beharrezko neurriak hartzea administrazio honetatik kanpokoak izanik kasuan inplikatuta dauden langileen enpresekin, entitateekin edo administrazioekin koordinatzeko.

1. Ez zaie agindu hau aplikatuko 5. artikuluan adierazitako eremuetatik kanpo gertatzen diren jokabideei. Hala ere, halako kasuetan, pertsona inplikatuen arteko harremana edo lotura lan-kontuengatik sortua bada, administrazio honek neurriak hartuko ditu bere langileei orientazioa, laguntza eta aholkularitza eskaintzeko, zeren eta bere eginbeharra baita langileen osasuna babestea eta konpromisoa hartua baitauka erakundearen kultura aldatzeko sexu-jazarpenaren eta sexuan oinarritutako jazarpenaren aurrean tolerantzia-izpirik egon ez dadin.

2. Agindu hau ez da aplikatuko alderdi inplikatu guztiak administrazio honetatik kanpokoak direnean. Hala ere, halako kasuetan, jokabideak administrazio honen lantokiren batean gertatu badira, ukitutako pertsonek lan egiten duten enpresekin, entitateekin edo administrazioarekin elkarlanean arituko da administrazio hau, egokiak diren jardute-prozedurak abian jar daitezen bultzatzeko.

Sexu-jazarpena, sexuan oinarritutako jazarpena edo jazarpen hori eragin dezaketen egoerak prebenitzeko, agindu honetaz gain, honako neurri hauek ezarriko dira:

Adierazpen formala eta idatzizkoa, erakundeek era guztietako sexu-jazarpenak eta sexuan oinarritutako jazarpenak gaitzesten dituztela adierazteko, bai eta eremu horietan jarduteko printzipioak azaltzeko ere, eta adierazpen hori administrazio honetako langile guztiei helaraztea.

Errespetuzko eta zuzentasunezko ingurune bat sustatzea, tratu-berdintasunaren, errespetuaren, duintasunaren eta nortasunaren garapen askearen balioak sustatuz, prestakuntza-ekintzen bidez Prestakuntza Planaren barruan eta langileak sentsibilizatzeko informazio-ekintzen bidez.

Agindu hau Segurtasun Administrazioko zerbitzu laguntzaileetako (aurrerantzean SAZL) lan-kontratudun langileen harrera-eskuliburuan sartzea, eta horren berri ematea Prebentzio eta Lan Osasuneko Alorrak langileei egiten dien harreran.

Dauden lege-baliabide guztiak erabiltzea, eta, era berean, antzematen diren jazarpen-kasuak prebenitzeko eta horietan esku hartzeko beharrezkoak diren antolaketa-baliabide guztiez hornitzea.

Agindu hau lan-kontratudun langileen intranetean (Gurenet) argitaratzea, langile guztiek horren berri izan dezaten eta jazarpen-kasu baten aurrean zer egin behar den jakin dezaten.

Hiru fasetan garatuko da administrazio honen eremuan gertatzen diren sexu-jazarpeneko edo sexuan oinarritutako jazarpeneko kasuetan jarduteko prozedura:

1. fasea. Hasiera: jakinarazpena eta harrera.

2. fasea. Ikerketa interesdunak idazki bat aurkezten duenean hasten da, eta xede horretarako propio izendatuko den batzorde baten bidez garatzen.

3. fasea. Giza Baliabideen Zuzendaritzaren ebazpena. Haren bidez, zehapen-prozedura abiarazi eta neurri zuzentzaileak ezartzen dira, edo, bestela, prozedura artxibatzen da.

Sexu-jazarpena edo sexuan oinarritutako jazarpena jasaten duten administrazio honetako langileek edo administrazio honen eremuan mota horretako jazarpen-jokabideak detektatzen dituen orok horren berri eman ahal izango dio Aholkularitza eta Laguntza Batzordearen idazkariari, hitzez zein idatziz; langile guztiei jakinaraziko zaie zein diren Aholkularitza eta Laguntza Batzordearekin harremanetan jartzeko bideak, elektronikoa barne, azken xedapenetako bigarrenaren arabera.

Prozedura hori hasi egingo da, ustez jazarri den pertsonak Laneko eta Gizarte Segurantzako Ikuskatzailetzan salaketa aurkeztu ala ez. Ekintza bat bide judizialetik aurkezteak agindu honetan arautzen den prozedura etengo du, hargatik eragotzi gabe har daitezkeen kautela-neurri guztiak.

1. Batzorde hau da ezartzen den baliabidea administrazio honen esparruan sexu-jazarpena edo sexuan oinarritutako jazarpena izan daitezkeen jokabideen jakinarazpena eta/edo salaketak kudeatzeko, ukitutako pertsonari orientazioa eta aholkularitza emateko, beharrezkoak diren babes-neurriak hartzeko, hala badagokio, eta, agindu honetan araututako prozedura amaitutakoan, neurri zuzentzaileak proposatzeko (ezarpenaren jarraipena eta ebaluazioa egiteko epeak aipatuta) eta ikerketa-fasea amaitzeko.

2. Hauek osatuko dute Aholkularitza eta Laguntza Batzordea:

   1. Giza Baliabideen Zuzendaritzako kide bat.

   2. Prebentzio eta Lan Osasuneko Alorreko teknikari bat, goi-mailako titulua laneko arriskuen prebentzioan duena eta ergonomia eta psikosoziologia aplikatuko espezialitatea duena.

   3. Segurtasun Saileko edo Polizia eta Larrialdietako Euskal Akademiako berdintasun-teknikari bat, inplikatutako pertsonek organismo horretan zerbitzuak ematen badituzte.

   4. SAZLko lan-kontratudun langileen prebentzioko ordezkari bat, Lantoki arteko Batzordeak proposatuta.

   5. Idazkari bat, Giza Baliabideen Zuzendaritzakoa, Zuzenbidean lizentziaduna edo graduduna, laneko arriskuen prebentzioan goi-mailako titulazioa eta ergonomia eta psikosoziologia aplikatuko espezialitatea duena.

      Batzorde horretako kideak Administrazio eta Zerbitzuen Sailburuordetzako Giza Baliabideen Zuzendaritzak izendatuko ditu. Guztiek izango dute hitza eta botoa, idazkariak izan ezik, hitza izango baitu, baina botorik ez. Batzordeburuak kalitateko botoa izango du berdinketa gertatuz gero.

3. Osaera horrek ordezkaritza orekatua izan dezan ahaleginduko da, eta Batzordea osatzen duten pertsona guztiek jaso beharko dute berdintasunari buruzko etengabeko prestakuntza, eta, bereziki, sexu-jazarpenari eta sexuan oinarritutako jazarpenari buruzkoa. Halaber, arau hau aplikatzeko xedatutako prestakuntza espezifikoa jasoko dute, eta Berdintasunerako Batzorde Teknikoak onartuko du prestakuntza horren ibilbidea.

4. Honako hauen arabera arautuko da Aholkularitza eta Laguntza Batzordearen funtzionamendua:

   1. Sektore Publikoaren Araubide Juridikoaren urriaren 1eko 40/2015 Legearen xedapenak.

   2. Agindu honen xedapenak.

   3. Funtzionamenduari buruzko barne-erregelamenduan xedatutakoa.

      Batzorde honetako kideek, Sektore Publikoaren Araubide Juridikoaren urriaren 1eko 40/2015 Legearen 23.2 artikuluan adierazitako egoeraren batean dauden pertsonek bezala, ez dute parte hartuko agindu honetan arautzen den prozeduran, eta, era berean, interesdunek edo ukitutako pertsonek errekusatzea sustatu ahal izango dute izapidetzearen edozein unetan. Abstenitzeko arrazoiren bat gertatzen bada, edo ezinbesteko arrazoiren batengatik Batzordeko kideren batek ezin badu parte hartu, ordezko bat izendatuko da kasu zehatz horretarako, zeinak Batzordeko gainerako kideei eskatzen zaien prestakuntza bera izan beharko baitu.

5. Aurrekoa gorabehera, Batzordeak beharrezkotzat jotzen duenean, beste teknikari batzuen laguntza eska dezake; halakoetan ere, beti bermatuko da konfidentzialtasuna.

1. Batzordeak jakinarazpen bat jasotzen duenean edo jakiten duenean sexu-jazarpen edo sexuan oinarritutako jazarpen izan daitezkeen egitateak gertatu direla, idazkariak berehala dei egingo die batzorde horretako kideei, eta ahalik eta azkarren jarriko da harremanetan ukitutako pertsonarekin, hasierako elkarrizketarako hitzordua emateko. Jakinaraziko dio, halaber, prebentzio-delegatu batekin edo aukerako beste edonorekin ager daitekeela hitzordu horretara.

2. Hasierako elkarrizketa horretan izango dira Prebentzio eta Lan Osasuneko Alorreko teknikaria eta idazkaria:

   1. Konfidentzialtasun-akordioa sinatuko da; une horretatik aurrera, prozeduran parte hartzen duten guztiek ere akordio hori sinatu beharko dute.

   2. Prebentzio eta Lan Osasuneko Alorreko zerbitzu medikora joateko aukera eskainiko zaio ukitutako pertsonari, baloratu ahal izateko salaturiko egoerak zer osasun-ondorio ekarri dizkion eta, hala badagokio, babes-neurriak hartzeko beharra dagoen.

   3. Prozeduraren, faseen eta bermeen berri emango zaio.

   4. Erabakiak hartzeko ezagutu behar duen informazioa emango zaio: eskubideak, aukerak eta ekintzak.

   5. Jakinarazi dituen egitateak, inplikatutako pertsonak eta dauden frogak zehazten eta idatziz adierazten lagunduko zaio.

   6. Pertsona horiei hasierako aholkularitza juridikoa, medikoa eta psikologikoa bermatuko zaie, hargatik eragotzi gabe biktimek erabaki dezatela Jaurlaritzak berak sexu-indarkeriaren biktimei orokorrean eskainitako beste baliabide batzuk erabiltzea.

1. Hasierako elkarrizketaz gain, Aholkularitza eta Laguntza Batzordea behar bestetan bilduko da, edo jarriko da harremanetan ukitutako pertsonarekin, kasuaren inguruabarrak eta beharrak zein diren.

2. Batzorde honek pertsona inplikatuen osasuna babesteko beharrezkoak diren neurriak ezarri ahal izango ditu, edo, hala badagokio, organo eskudunei proposatu ahal izango dizkie.

1. Harrera-faseko jarduketak egin ondoren, ukitutako pertsonak erabakitzen badu prozedurarekin jarraitzea idazki formala aurkeztuta, lehenengo fasea amaitutzat joko da, eta ikerketa-faseari ekingo zaio.

2. Ukitutako pertsonak adierazten badu ez duela salaketarik aurkeztu nahi, prozedura artxibatu egingo da. Dena den, halako kasuetan, jasotako informazioa kontuan hartuta Aholkularitza eta Laguntza Batzordeak uste badu badaudela ebidentziak, zantzuak edo susmo oinarrituak pentsatzeko sexu-jazarpeneko edo sexuan oinarritutako jazarpeneko egoera bat gertatu dela, ofizioz jardungo du, eta zantzu horiei aurre egiteko behar diren neurriak edo jarduketak aginduko ditu, betiere ukitutako pertsonaren borondatea eta konfidentzialtasun-printzipioa errespetatuz.

1. Jakinarazpena jasotzen duen unetik aurrera, Batzordeak prozeduran sortzen diren dokumentu guztiak zainduko ditu; dokumentu horietan, alderdi inplikatuak zenbakizko kodeen bidez identifikatuko dira.

2. Lehenengo fasea amaitutakoan, fase horretan parte hartzen duten Batzordeko kideek txosten bat idatziko dute, non datu hauek jasoko baitira labur-labur: inplikatuta dauden alderdiak kodeen bidez identifikatuta; egindako jarduketak eta datak, eta onartutako edo proposatutako babes- eta prebentzio-neurriak.

Oro har, fase hau gehienez hamar egun balioduneko epean garatuko da, 13. artikuluan aurreikusitako elkarrizketa egin eta hurrengo egunetik aurrera. Epe hori luzeagoa izan daiteke, beharrezkoa bada eta arrazoituta badago, kontuan hartuta, betiere, kasu zehatzaren inguruabarrak eta beharrak, pertsonen babesa eta prozeduraren gainerako bermeak.

1. Ukitutako pertsonak sinatutako salaketa idatziarekin hasiko da ikerketa-fasea. Salaketa horretan, zera adieraziko da: egitateak; ustezko jazarpenaren egilea; jazarpena dela-eta salatzaileak izan dituen ondorioak, eta dituen frogak.

2. Salaketa Giza Baliabideen zuzendariari zuzenduko zaio, haren gaineko jazarpen-susmorik ez badago behintzat; kasu horretan, Administrazio eta Zerbitzuen sailburuordeari zuzenduko zaio, eta Polizia eta Larrialdietako Euskal Akademiaren zuzendariaren gaineko susmorik badago, aldiz, Segurtasuneko sailburuari.

1. Idazkariak inplikatutako alderdiei jakinaraziko die Aholkularitza eta Laguntza Batzordea zer pertsonak osatzen duten, eta salaketaren kopia bidaliko die. Jakinarazpena jaso ondoren, parte hartzen duten alderdiek batzorde horretako kideak errekusatu ahal izango dituzte, agindu honen 12.4 artikuluan ezarritakoaren arabera.

2. Aurreko apartatuan adierazitako jakinarazpena egin hurrengo egunetik aurrera, bost egun balioduneko epea zabalduko da alegazioak aurkezteko. Errekusaziorik ez badago, Idazkaritzak berehala deituko du Batzordea, fase honi ekiteko.

1. Lehenengo bileran, Aholkularitza eta Laguntza Batzordeak salaketa eta aurkeztutako alegazioak aztertuko ditu, eta erabakiko du zer jarduketa egin behar den kasua aztertzeko, eta babes-neurriak hartzeko beharra dagoen.

2. Salaketa artxibatzeko aukera aztertuz gero lehenengo bileran, erabakiak ahobatezkoa, arrazoitua eta idatzia izan beharko du, eta alderdiei jakinarazi beharko zaie.

3. Salaketa jasotzen duen unetik, Aholkularitza eta Laguntza Batzordeak, Idazkaritzaren bidez, zainduko du sortzen den dokumentazio guztia; dokumentu horietan, alderdi inplikatuak zenbakizko kodeen bidez identifikatuko dira.

1. Aholkularitza eta Laguntza Batzordeak behar diren jarduketak egingo ditu, jakiteko ea sexu-jazarpena edo sexuan oinarritutako jazarpena gertatu den, agindu honetan ezarritakoaren arabera. Lan hori egiteko garaian, 9. artikuluan jasota dauden printzipioak eta bermeak beteko ditu une oro Batzordeak, eta salatutako egitateak jarduketa-prozedura honen aplikazio-eremuan sartzen diren edo ez zehazten lagunduko duten zantzuak eta informazioa eskuratuko ditu.

2. Ikerketaren esparruan, Aholkularitza eta Laguntza Batzordeak bilerak egin ahal izango ditu alderdiekin; asmoa bada bi alderdiak bilera berean elkartzea, nahitaezkoa izango da biak beren-beregi ados egotea.

3. Alderdiak, beren borondatez, deitutako bilera guztietara joan daitezke, eta, hala nahi izanez gero, prebentzio-delegatuarekin agertuko dira, edo beharrezkotzat jotzen duten beste edonorekin.

4. Aholkularitza eta Laguntza Batzordeak aztergaiarekin zuzeneko zerikusia duten pertsonak dei ditzake bileretara eta haiekin elkarrizketak izan, dela egoeraren lekuko izan zirelako, dela dagokion gaian adituak direlako. Halakoetan, bileretara zein joango den jakinaraziko zaie alderdiei, eta konfidentzialtasun-bermea gordeko da beti.

5. Agindu honen eremuan barne hartutako langile guztiak behartuta daude Batzordeari laguntza ematera, hark ikerketa amaitzeko behar dituen irizpide-elementu guztiak izan ditzan.

1. Ikerketa-jarduketak amaiturik, batzordea osatzen duten lau lagunen gehiengo soilez onartuko da ondorioa; hau da, sexu-jazarpeneko edo sexuan oinarritutako jazarpeneko jokabidea gertatu den ala ez.

2. Gehienez hogei egun balioduneko epean, 20. artikuluan aurreikusitako bilera egin eta hurrengo egunetik aurrera, Aholkularitza eta Laguntza Batzordeak txostena egingo du, zeina loteslea izango baita zehapen-prozedura hasteko ondorioetarako. Epe hori luzeagoa izan daiteke, beharrezkoa bada eta arrazoituta badago, kontuan hartuta, betiere, kasu zehatzaren inguruabarrak eta beharrak, pertsonen babesa eta prozeduraren gainerako bermeak.

3. Aholkularitza eta Laguntza Batzordearen txostenak eduki hau izango du:

   1. Alderdien identifikazioa, dagozkion identifikazio-datuen bidez.

   2. Ikerketan eta txostena idazten parte hartu duten pertsonen izen-abizenak.

   3. Kasuaren aurrekariak, salaketa eta inguruabarrak.

   4. Beste jarduketa batzuk: frogak, egitate nagusien laburpena eta garatutako jarduketen laburpena. Lekukoak elkarrizketatu badira, eta konfidentzialtasuna bermatze aldera, jarduketa horien laburpenean ez da adieraziko nork egin dituen adierazpenak; soilik jasoko da ikertu diren egitateen egiazkotasuna berretsi duen ala ez.

   5. Inguruabar astungarriak, halakorik badago:

      1. Salatua berrerorlea bada jazarpen-egintzetan.

      2. Bi pertsona edo gehiago jazarri baditu.

      3. Egiaztatzen bada jazarritako pertsonak, lekukoek edo jazarriaren lan- edo familia-inguruneko beste pertsona batzuek larderiazko jokabideak, errepresaliak, presioak edo derrigortzeak jasan dituztela jazarlearen eskutik eta haren helburua aribideko ikerketa eragoztea edo kaltetzea zela.

      4. Jazarleak erabakimena badu jazarritako pertsonaren lan-harremanari dagokionez.

      5. Jazarritako pertsonak desgaitasunen bat badauka.

      6. Jazarritako pertsonak alterazio larriak sufritu baditu bere egoera fisiko edo psikologikoan, eta arazo horiek mediku batek egiaztatu baditu.

   6. Arrisku psikosozialen txostena, halakorik egin bada.

   7. Ikerketaren ondorioak eta, hala badagokio, proposatu diren neurri zuzentzaileak, erreferentzia eginez haien jarraipenerako eta ebaluaziorako epeei.

1. Aholkularitza eta Laguntza Batzordeak espedientea bidaliko dio Giza Baliabideen Zuzendaritzari edo, bestela, hierarkian goragoko auzibideari, zeinek ebazpena emango baitu dagokion eskumen-arauaren arabera.

2. Ebazpena emateko, gehienez zazpi egun balioduneko epea izango du, Aholkularitza eta Laguntza Batzordearen ondorioei buruzko txostena jaso eta hurrengo egunetik aurrera.

3. Ebazpen horretan:

   1. Salatzailearen eta salatuaren identifikazio-datuak, salaketaren arrazoia eta egiaztatuta dauden egitateak agertuko dira.

   2. Arriskua edo eragindako kaltea minimizatzeko edo desagerrarazteko beharrezkoak diren neurri zuzentzaileak proposatuko dira, eta nork aplikatu behar dituen erabakiko da.

   3. Giza Baliabideen Zuzendaritzak zehapen-prozedura hastea erabaki edo proposatuko dio organo eskudunari, frogatutako egitateak eta inguruabarrak kontuan hartuta. Horrez gainera, ikerketatik ondorioztatzen bada jazarpenaz bestelako faltaren bat egin dela eta falta hori indarrean dagoen araudian edo aplikatu behar diren hitzarmenetan tipifikatuta dagoela, diziplinazko espedientea hastea proposatuko da. II. eranskinean daude jasota hartu beharreko diziplina-neurriak.

   4. Ez badago ebidentziarik behar bezala frogatzen duenik sexu-jazarpeneko edo sexuan oinarritutako jazarpeneko jokabidea egon dela, salaketa artxibatu egingo da.

4. Salatzaileari eta salatuari ebazpena jakinaraziko zaie.

Prebentzio eta Lan Osasuneko Alorra arduratuko dira neurri zuzentzaileen aplikazioa eta eraginkortasuna kontrolatzeaz; orobat, aztertuko dute zer lan-egoeratan geratu diren inplikatutako pertsonak prozeduraren ondoren.

Prozeduraren aplikazioari jarraipena egingo zaio, bai eta laneko giroarekin zerikusia duten eta jazarpen-kasuak detektatzeko balio dezaketen bestelako alderdiei ere.

LEHENENGO XEDAPEN GEHIGARRIA. Legezko ekintzak.

Hemen zehaztutako prozedura baliatzeak ez dio eragotziko salatzaileari, aldi berean edo gerora, ekintza administratiboak edo judizialak egikaritzea. Aitzitik, ekintza bat bide judizialetik aurkezteak agindu honetan arautzen den prozedura etengo du.

BIGARREN XEDAPEN GEHIGARRIA. Jarraipena eta ebaluazioa.

Aholkularitza eta Laguntza Batzordeak, urtean behin, prozedura honen aplikazioari buruzko txostena bidaliko die Berdintasunerako Batzorde Teknikoari eta lan-kontratudun langileen Laneko Segurtasun eta Osasun Batzordeari. Txosten horretan, gutxienez adierazle hauek agertuko dira, sexuaren arabera desagregatuta:

1. Sexu-jazarpeneko edo sexuan oinarritutako jazarpeneko jakinarazpenak aurkeztu dituzten langileen kopurua, eta kopuru horrek langile guztien gainean egiten duen ehunekoa.

2. Sexu-jazarpeneko edo sexuan oinarritutako jazarpeneko salaketak aurkeztu dituzten langileen kopurua, eta kopuru horrek langile guztien gainean egiten duen ehunekoa.

3. Prozedura honen esparruan ezarri diren babes-neurrien kopurua eta tipologia.

4. Prozedura honen esparruan egin diren ebazpenen kopurua.

5. Prozedura dela-eta hasi diren zehapen-prozeduren kopurua.

6. Garatu diren prozeduren iraupenaren batezbestekoa (egunetan adierazita).

7. Sexu-jazarpenari eta sexuan oinarritutako jazarpenari buruz langileentzat egin diren informazio-, sentsibilizazio- eta prestakuntza-ekintzen kopurua eta tipologia.

8. Agindu honetan araututako prozeduraren edozein fasetan parte hartzen duten pertsonentzat egin diren prestakuntza-ekintzen kopurua eta tipologia.

   HIRUGARREN XEDAPEN GEHIGARRIA. Prozeduraren aplikazioa.

   Agindu hori aplikatuko da, halaber, ustezko jazarpen-egoera Ertzaintzako lan-kontratudun baten eta praktiketako edo karrerako funtzionario baten artean gertatzen denean, salbuespen batekin: Aholkularitza eta Laguntza Batzordean, Ertzaintzako langileen ordezkari gisa, prebentzioko ordezkari bat ere izango da, Laneko Segurtasun eta Osasun Batzordean ordezkaritza duten sindikatuek proposatuta izendatua.

   LAUGARREN XEDAPEN GEHIGARRIA. Berrikuspena.

   Egoki irizten dionean berrikusiko du agindu hau Berdintasunerako Batzorde Teknikoak edo, bestela, Funtzio Publikoko Sailburuordetzak horretarako izendatuko duen organoak, eta beharrezkoak diren aldaketak eta hobekuntzak proposatuko ditu.