Ongi etorri Legegunea atarira

Atal Korporatiboko buru (Espedienteak) lanpostua hutsik dago Osakidetza-Euskal osasun zerbitzuko Zuzendaritza Nagusian, Estrategia Ekonomikoko eta Eraldaketako Zuzendaritzan, Analisi Ekonomikoko eta Logistika Korporatiboko Zuzendariordetzan, Erosketa Integratuko eta Katalogoko Zerbitzuan. Hori dela-eta, bat etorriz Euskadiko Antolamendu Sanitarioaren ekainaren 26ko 8/1997 Legearen 28. artikuluan, Osakidetza-Euskal osasun zerbitzuko lanpostu funtzionalak arautzen dituen uztailaren 19ko 186/2005 Dekretuan eta Osakidetza-Euskal osasun zerbitzua Ente Publikoko Estatutuak ezartzen dituen azaroaren 11ko 255/1997 Dekretuan xedatutakoarekin, Langileen eta Talentuaren Zuzendaritza honek erabaki du deialdi publikoa iragartzea aipatutako lanpostua izendapen askez hornitzeko, oinarri hauen arabera

OINARRIAK

Lehenengoa. Lanpostuaren atxikipena.

Atxikipena: Osakidetza-Euskal osasun zerbitzuko Zuzendaritza Nagusia, Estrategia Ekonomikoko eta Eraldaketako Zuzendaritza, Analisi Ekonomikoko eta Logistiko Korporatiboko Zuzendariordetza, Erosketa Integratuko eta Katalogoko Zerbitzua (Vitoria-Gasteiz).

Lanaldia: Zatitua.

Hizkuntza-eskakizuna: 3. HE (derrigortasun-data: 2024-02-22).

Bigarrena. Lanpostuaren eginkizunak.

1. Kontratazio administratiboa:

   Espedienteak eta kontratuak:

   Erosketen ataleko langileen artean espedienteak banatzea eta espedientearen faseetan egin beharreko atazen jarraipena egitea, espedientea esleitu arte.

   Kontratuen betearazpena jarraitzea. Espedienteen kudeatzailean eta SAPen izapidetu beharreko intzidentziak banatzea Erosketen Ataleko langileen artean (luzapenak, zenbateko- edo enpresa-aldaketak, produktuaren ordezkapenak eta abar). Horretaz gain, egin beharreko atazak jarraitzea horiek amaitu arte.

   Katalogoko Ataleko buruari jakinaraztea espedienteak esleitzearen ondorioz katalogoan egin beharreko aldaketak, bai eta hobekuntza teknologikoagatik onartu diren produktu-ordezkapenak ere, katalogoa eguneratuta mantentzeko.

   Zentroei jakinaraztea kontratazio-espedienteekin eta kontratuekin lotutako guztia (esleipena, esparru-kontratuak, aldaketak eta abar).

   KPIak lortzea: jarduera, epeak eta abar.

   Eguneratuta mantentzea plegu teknikoen txantiloiak, AKPArako informazioa duten eranskinak, prozedurak eta abar.

   Zentroek jakinarazitako produktuen intzidentzien jarraipena egitea eta intzidentzia horiek konpontzea, Asistentzia Sanitarioko Zuzendaritzako langileekin lankidetzan.

   Erosketa Integratuko Batzordearen bileretara joatea eta akta egitea.

   Espediente bakoitzaren batzorde tekniko espezifikoen bileretara joatea espedientea izapidetzeko faseetan.

   Horniduren kontratazio-espedienteak hasi aurreko analisi ekonomikoak egitea.

   Hobarien jarraipena egitea eta zentroei horien berri ematea.

   Zigor-memoria edo kontratu-ebazpenak egitea, hala badagokio.

   Erosketa-prozesuari buruzko aholkularitza ematea gainerako zuzendaritza, zuzendariordetza eta zerbitzuei.

2. Datuen analisia:

   Erosketak, kontsumoak eta stock-ak analizatzea; erosketa integratuen jarraipena egitea. Txostenak egitea, Osakidetza-Euskal osasun zerbitzuko zuzendariek, Osasun Sailak edo beste erakunde batzuk hala eskatzen badute.

3. Espedienteen kudeatzailea:

   Kontratazio administratiboarekin eta informatikoarekin batera kudeatzea Izapide espediente-kudeatzailearekin lotutako zuzendu beharrekoak eta hobekuntzak. Eskabideak analizatzea, eskatzea eta jarraitzea.

   Hirugarrena. Parte hartzeko baldintzak.

   Deialdi honetan parte hartu ahal izango dute baldintza hauek betetzen dituztela egiaztatzen dutenek:

   1. Estatutupeko, funtzionario edo langile lan-kontratudun finkoa izatea Osakidetza-Euskal osasun zerbitzuko edozein zerbitzu-erakundetan eta lanpostua jabetzan edukitzea A2 lanbide-taldean.

   2. Gutxienez 4 urteko lan-esperientzia izatea administrazio publikoan A2 lanbide-taldean.

   3. Osakidetza-Euskal osasun zerbitzuko lanpostu funtzionalak arautzen dituen uztailaren 19ko 186/2005 Dekretuko eta Osakidetza-Euskal osasun zerbitzuko Euskara Planeko gainerako baldintzak.

      Laugarrena. Baloratuko diren merezimenduak.

      Prestakuntza edota esperientzia Sektore Publikoko Kontratuen Legean.

      Prestakuntza edota esperientzia izatea Izapide eta Eginbide espedienteen kudeatzaileetan.

      Prestakuntza edota esperientzia izatea SAP ERPeko Logistikako moduluan.

      Prestakuntza edota esperientzia izatea erosketetan eta logistikan.

      Prestakuntza edota esperientzia izatea informazio ekonomikoaren eta aginte-taulen analisietan.

      Ofimatikari buruzko ezagutzak: Word eta Excel.

      Esperientzia izatea taldeak kudeatzen.

      Esperientzia izatea prozesuak hobetzen.

      Lanpostu hau betetzeko interesgarria izan daitekeen eta balioa erants dezakeen edozein merezimendu aurkeztu ahalko da.

      Bosgarrena. Euskararen ezagutza.

      Osakidetza-Euskal osasun zerbitzuan Euskararen erabilera normalizatzeko martxoaren 18ko 67/2003 Dekretuak eta berau garatzen duten arauek xedatutakoaren arabera egingo da balorazioa.

      Seigarrena. Eskabideak aurkezteko epea eta modua.

      Interesdunek Osakidetza-Euskal osasun zerbitzuko Zuzendaritza Nagusiko Langileen eta Talentuaren Zuzendaritzara bidali beharko dituzte eskabideak. Horretarako 10 egun balioduneko epea izango dute, ebazpen hau EHAAn argitaratu eta hurrengo egunetik aurrera. Halaber, Administrazio Publikoen Administrazio Prozedura Erkidearen urriaren 1eko 39/2015 Legearen 16.4 artikuluan ezarritako eran aurkeztu ahalko dira eskabideak.

      Interesdunek Zuzendaritza Nagusiko Langileen eta Talentuaren Zuzendaritzara bidali beharko dute eskabidea (Araba kalea 45, 01006 Vitoria-Gasteiz), beren datu pertsonal guztiekin eta dokumentatutako curriculum vitaearekin batera.

      Dokumentu hauek aurkeztu beharko dira:

      NANaren, pasaportearen edo gidabaimenaren fotokopia konpultsatua.

      Funtzionario edo estatutupeko langile izendapenaren fotokopia konpultsatua edo, hala badagokio, langile lan-kontratudun finkoa dela egiaztatzen duen agiriarena.

      Baldintzak betetzen dituela egiaztatzen duten dokumentu guztien fotokopia konpultsatua.

      Merezimendu baloragarriak egiaztatzen dituzten dokumentu guztien fotokopia konpultsatua.

      CVaren aplikazio informatiko korporatiboan behar bezala baliozkotuta dauden alderdiak ez dira ziurtatu behar izango aurreko paragrafoan ageri den moduan; hala ere, eskatzaileak horren berri eman behar du eskaeran.

      Zazpigarrena. Balorazio Batzordea.

      Balorazio Batzordea osatuko da, Emakumeen eta gizonen berdintasunerako eta emakumeen aurkako indarkeria matxistarik gabe bizitzeko Legearen testu bategina onartzen duen martxoaren 16ko 1/2023 Legegintzako Dekretuaren 21. artikuluak ezarritakoaren arabera; hortaz, horren burua Hautaketako eta Horniketako zuzendariordea edo haren eskuordea izango da eta kide hauek izango ditu: Analisi Ekonomikoko eta Logistika Korporatiboko zuzendariordea eta Erosketa Integratuko eta Katalogoko Zerbitzuko burua (azken horrek idazkari gisa jardungo du eta hitza eta botoa izango ditu).

      Batzordeak, eskabideak baloratu ondoren, eginbide osagarriak gauzatzea erabaki dezake, eta izangaiei horien berri emango zaie.

      Izangaien balorazioa egindakoan, eta berau kontuan hartuta, dagokion izendapena egiteko proposamena aurkeztuko da. Lanpostua hutsik uztea proposa dezake epaimahaiak, betiere aurrez txosten arrazoitua eginez, baldin eta izangaiek betetzen ez badituzte bete beharreko baldintzak.

      Akta egingo da Batzordea biltzen den bakoitzean. Bertan, aurkeztutako izangaiak eta gauzatutako eginbide osagarriak (halakorik balego) zerrendatuko dira, eta emango dira lanpostua euretako bati esleitzeko edo deialdia hutsik uzteko kontuan hartutako arrazoiak.

      Zortzigarrena. Hautaketa-prozedura.

      Ezin izango dira baloratu, inolaz ere, deialdia EHAAn argitaratzen den egunean eskuratu gabe dauden merezimenduak, ez eta eskabideak aurkezteko epea amaitu aurretik behar bezala alegatu eta egiaztatu ez direnak ere.

      Bederatzigarrena. Prozedurari amaiera ematen dion ebazpena.

      Osakidetza-Euskal osasun zerbitzuko Langileen eta Talentuaren zuzendariaren ebazpenaren bidez amaituko da honen bidez hasitako prozedura (lanpostua esleitzea edo hutsik uztea). Ebazpen horrek ondorioak izango ditu EHAAn argitaratzen den egunetik aurrera, bertan besterik xedatu ezean.

      Hamargarrena. Ebazpen honen aurkako errekurtsoak.

      Ebazpen honen aurka gora jotzeko errekurtsoa aurkeztu ahal izango zaio Osakidetza-Euskal osasun zerbitzuko zuzendari nagusiari. Horretarako, hilabeteko epea izango da, Ebazpena Euskal Herriko Agintaritzaren Aldizkarian argitaratu eta hurrengo egunetik aurrera.

      Vitoria-Gasteiz, 2026ko irailaren 15a.

      Osakidetza-Euskal osasun zerbitzuko Langileen eta Talentuaren zuzendaria,

      JOSUNE RETEGI ORMAZABAL.