- EBAZPENA, 2015eko maiatzaren 4koa, Natura Ingurunearen eta Ingurumen Plangintzaren zuzendariarena, zeinaren bidez jendaurrean jartzen baita ondokoa:Toloño-Kantabria mendilerroa (ES2110018) Kontserbazio Bereziko Eremu (KBE) izendatzea, eta hari dagozkion helburuak eta kontserbazio neurriak, eta Arabako hegoaldeko mendilerroak Hegaztientzako Babes Bereziko Eremuarenak (HBBE, ES0000246). - Legegunea: Euskal Herriko araudia - Eusko Jaurlaritza - Euskadi.eus
Arautegia
InprimatuEBAZPENA, 2015eko maiatzaren 4koa, Natura Ingurunearen eta Ingurumen Plangintzaren zuzendariarena, zeinaren bidez jendaurrean jartzen baita ondokoa:Toloño-Kantabria mendilerroa (ES2110018) Kontserbazio Bereziko Eremu (KBE) izendatzea, eta hari dagozkion helburuak eta kontserbazio neurriak, eta Arabako hegoaldeko mendilerroak Hegaztientzako Babes Bereziko Eremuarenak (HBBE, ES0000246).
Identifikazioa
- Lurralde-eremua: Autonomiko
- Arau-maila: Ebazpena
- Organo arau-emailea: Ingurumen eta Lurralde Politika Saila
- Jadanekotasuna-egoera: Indarrean
Aldizkari ofiziala
- Aldizkari ofiziala: EHAA (Euskal Herria)
- Aldizkari-zk.: 84
- Hurrenkera-zk.: 2014
- Xedapen-zk.: ---
- Xedapen-data: 2015/05/04
- Argitaratze-data: 2015/05/08
Gaikako eremua
- Gaia: Ingurune naturala eta etxebizitza
- Azpigaia: Ingurumena; Hirigintza eta etxebizita; Nekazaritza eta arrantza
Testu legala
Ingurumen eta Lurralde Politikako sailburuaren 2015eko apirilaren 21eko Aginduaren bitartez honako hau erabaki da: aldez aurretik onestea Toloño-Kantabria mendilerroa Kontserbazio Bereziko Eremu (KBE, ES2110018) izendatzen duen eta hari dagozkion kontserbazio neurriak eta Arabako hegoaldeko mendilerroak Hegaztientzako Babes Bereziko Eremuarenak (HBBE, ES0000246) onartzen dituen dekretu-proiektua.
Xedapen orokorrak egiteko prozedurari buruzko abenduaren 22ko 8/2003 Legeko 8.1 artikuluarekin bat, eta apirilaren 15eko 1/2004 Legegintza Dekretuaz onartutako Natura Babesteari buruzko testu bategineko 22.2 artikuluarekin bat, ingurumena babesteko helburua duten irabazi-asmorik gabeko erakundeen eta administrazioen entzunaldi-izapideak egin behar dira; horrez gain, eremuen izendapenak jendaurrean jarri behar dira, honako hauek adierazita: lekuaren kartografia mugapenarekin, izendapenak justifikatzen dituzten batasunaren intereseko habitat motak eta flora eta fauna espezieak, horien kontserbazio-egoeraren balorazioa, lekuak kontserbatzeko helburuak eta arauak, eta jarraipen programak.
Horregatik guztiagatik, Ingurumen eta Lurralde Politika Sailaren egitura organikoa eta funtzionala ezartzeko apirilaren 9ko 196/2013 Dekretuko 6.e) artikuluan xedatutakoarekin bat, honako hau
Lehenengoa. Jendaurrean jartzea honako hau: Arabako Lurralde Historikoko Toloño-Kantabria mendilerroa (ES2110018) Batasunaren Garrantzizko Lekua (BGL) Kontserbazio Bereziko Eremu (KBE) izendatzea, hari dagozkion helburu eta kontserbazio neurriekin, eta Arabako hegoaldeko mendilerroak Hegaztientzako Babes Bereziko Eremuarenak (HBBE); jendaurrean jarriko dira EHAAn iragarki hau argitaratu eta biharamunetik, 2015eko uztailaren 9ra arte. Epe horretan, egoki irizten dieten alegazioak aurkeztu ahal izango dituzte interesdunek.
Bigarrena. Aurreko paragrafoan xedatutakoaren ondorioetarako, epe horretan dokumentazioa ikusgai izango da, bai egoitza elektronikoan (www.euskadi.eus/natura2000), bai EAEko Administrazio Orokorraren Ingurumen eta Lurralde Politika Saileko Natura Ingurunearen eta Ingurumen Plangintzaren Zuzendaritzan, jendaurreko ordutegian, helbide honetan:
Natura Ingurunearen eta Ingurumen Plangintzaren Zuzendaritza.
Ingurumen eta Lurralde Politika Saila.
Eusko Jaurlaritza.
Donostia kalea, 1.
01010 Vitoria-Gasteiz.
Vitoria-Gasteiz, 2015eko maiatzaren 4a.
Natura Ingurunearen eta Ingurumen Plangintzaren zuzendaria,
AMAIA BARREDO MARTÍN.