Ongi etorri Legegunea atarira

Agindu honen bidez arautu egiten dira eraginkortasun energetikoaren ziurtagiriak erregistroan inskribatzeko prozedura eta erregistro horren funtzioak. Erregistro hori aurreikusita dago eraikin berrien eraginkortasun energetikoaren ziurtagiriak arautzen dituen azaroaren 22ko 240/2011 Dekretuaren 6. artikuluan.

Aurreko artikuluan aipatutako ziurtagiriak erregistroan inskribatuta, honako helburu hauek bete nahi dira:

• Jakitera ematea eraikinen kalifikazio energetikoari buruzko oinarrizko informazioa, haien ezaugarri energetikoak, inguratzaile termikoak, instalazioak, funtzionamendu-ezaugarriak, okupazioa eta eraikin baten eraginkortasun energetikoaren kalifikazioa zehazteko behar diren gainerako jakingarriak.

• Etiketa Energetikoa eskuratzeko ahalmena ematea.

• Lan tresna izatea bai administrazioentzat, bai Eraikin berrien eraginkortasun energetikoaren ziurtagiriak arautzen dituen Dekretuaren 10. eta 12. artikuluetan aipatzen diren erakundeentzat, hain zuzen ere eraikinen eraginkortasun energetikoaren arloan aplikagarri diren legeetan ezarritako kontrol- eta ikuskatze-lanak egiteko.

• Administrazioari laguntzea eraikinen eraginkortasun energetikoaren ziurtagirien aplikazio praktikoari buruzko azterlanak, analisiak eta estatistikak egiten, horiek balioko baitute eraginkortasun energetikoaren helburuak hobetuko dituzten neurriak diseinatzeko eta irizpideak finkatzeko.

1. Erregistroan, honako hauek inskribatuko dira:

   • Proiektuaren eraginkortasun energetikoaren ziurtagiria.

   • Bukatutako eraikinen eraginkortasun energetikoaren ziurtagiria.

   • Lehendik emandako eraginkortasun energetikoaren beste ziurtagiri batzuen berritzea edo eguneratzea.

   • Aurreko ziurtagiri guztien inskripzioaren ezeztatzea.

2. Inskribatu egingo dira, halaber, eraikin bateko etxebizitzen, lokalen edo era independentean ziurtatutako atalen eraginkortasun energetikoaren ziurtagiriak, bai eta ziurtagiri horien berritzeak, eguneratzeak edo ezeztatzeak ere.

Eraikinen eraginkortasun energetikoaren ziurtagirien erregistroak izaera informatikoa dauka, baina eraikinaren eraginkortasun energetikoari dagokionez bakarrik, eta ez du egiaztatuko eraikinari eska dakizkiokeen gainerako baldintzak betetzea.

1. Energiaren arloko eskumena duen zuzendaritzara egongo da atxikita eraikinen eraginkortasun energetikoaren ziurtagirien erregistroa.

2. Eraikinen eraginkortasun energetikoaren ziurtagirien erregistroa bakarra izango da Euskal Autonomia Erkidego osorako, eta eskuragarri egongo da, egoitza elektroniko honetan: https//www.euskadi.net

1. Eraikinaren edo haren atal independentearen jabeak edo sustatzaileak egin dezake proiektuaren eta bukatutako eraikinaren eraginkortasun energetikoaren ziurtagiria inskribatzeko eskaera, edo, bestela, haren izenean, kasuan kasuko ziurtagiria izenpetzen duen pertsonak; denek ere kanpoko kontrolaren onespen-txostena ematen den hilabetearen hurrengoan aurkeztu beharko dute eskaera. Baldin eta kanpoko kontrola egitea nahitaezkoa ez bada, inskripzio-eskaera hilabeteko epean egin beharko da, eraginkortasun energetikoaren ziurtagiria ematen denetik aurrera.

   Nolanahi ere, eraikina edo haren atal independente bat erosi edo alokatu baino lehen, eraginkortasun energetikoaren ziurtagiriak behar bezala inskribatuta beharko du erregistroan, hala ezarritako baitago 240/2011 Dekretuaren 16. artikuluan.

2. Inskripzio-eskaera modu elektronikoan aurkeztuko da, agindu honetako eranskinean ezarritako eredu normalizatuari jarraituz.

   Inskripzio-eskaera bide elektronikoz egiteko, interesdunek euren burua identifikatu behar dute ziurtagiri elektroniko onartuaren bitartez, Administrazio Elektronikoari buruzko otsailaren 21eko 21/2012 Dekretuan ezarritako eran.

   Hala ere, pertsona fisikoek beharrezko diren baliabide teknologikoak eskura ez badituzte, erregistrora bertaratzeko aukera izango dute. Hala, Energiaren Euskal Erakundearen bulegoetan aurkeztu ahal izango dituzte inskripzio-eskaerak, eta hango langileek, dokumentazioa baliozkotu ondoren, erregistro elektronikoan sartuko dute eskaera, izenpe elektronikoaren bitartez.

3. Eskabidearekin batera, honako agiri hauek aurkeztu beharko dituzte:

   • Eraginkortasun energetikoaren ziurtagiria, kanpoko kontrola arautzen duen Aginduaren I. eranskinean ezarritako ereduaren arabera emana, eta berau emateko ahala duen pertsona batek izenpetua, azaroaren 22ko 240/2011 Dekretuaren 3.1 artikuluarekin bat etorriz.

   • Ziurtatze energetikoaren prozedurari dagozkion fitxategi informatikoen kopia, hala badagokio.

   • Lortutako kalifikazioa A, B edo C baldin bada, kanpoko kontroleko aldeko txostena, egiaztatutako agente batek emana, kanpoko kontrol hori arautzen duen aginduan ezarritako ereduari jarraituz.

4. Interesdunek izapideak bide elektronikoz egin ondoren, erregistroak automatikoki emango du hartu-agiria, elektronikoki izenpetua, Administrazio Elektronikoari buruzko otsailaren 21eko 21/2012 Dekretuan ezarritako eran. Hartu-agiriaren mezu hori interesdunak inprimatu eta informatikoki artxibatzeko moduan konfiguratuko da, bai eta erregistroan identitatea bermatzeko moduan ere.

5. Hartu-agirian honako hauek jasoko dira:

   • Erregistroko zenbaki edo kode indibiduala.

   • Eskaera aurkeztu zeneko eguna eta ordua.

   • Aurkeztutako eskabidearen kopia. Alde horretatik, onartu egingo da formularioan sartutako datuak hitzez hitz erreproduzitzea.

   • Eskabideari erantsitako agirien zerrenda eta izenak, horietako bakoitzaren hatz-marka elektronikoarekin batera.

Baldin eta aurkezturiko eskabideetan agiriren bat falta edo akatsen bat badago, interesdunei eskatuko zaie hamar eguneko epean zuzen dezatela oker dagoena edo aurkez dezatela beharrezko den dokumentazio guztia. Horretaz gain, adieraziko zaie ezen horrela egiten ez badute, beren eskabidean atzera egin dutela joko dela, betiere egoera hauetakoren bat gertatzen bada:

• Inskribatu beharreko egintza edo agirietan forma-akatsak baldin badaude.

  6.3 artikuluan eskatzen diren agirietakoren bat aurkeztu ez bada.

• Euskarri digitalean aurkeztutako agiriak eskuratzerik ez badago.

Agindu honetan adierazitako baldintzak betetzen direla egiaztatu ondoren, ziurtagiriak inskribatu egingo dira erregistroan.

Behin ziurtagiria inskribatuta, erregistro-zenbakia jakinaraziko zaio sustatzaileari edo jabeari, eta, halaber, adieraziko zaio aurrerantzean eskuragarri izango duela aplikazio informatikoaren bitartez eraikin-proiektuaren edo bukatutako eraikinaren eraginkortasun energetikoaren etiketa.

1. Inskripzioak ezabatu egingo dira, egoera hauetakoren bat gertatzen bada:

   • Ziurtagirien inskripzioaren indarraldia bukatu, eta berritu ez bada.

   • Eraginkortasun energetikoaren ziurtagiria eguneratu ez bada, betiere azaroaren 22ko 240/2011 Dekretuaren 5.2 artikuluan aurreikusitako kasuetan (240/2011 Dekretua, Eraikin berrien eraginkortasun energetikoaren ziurtagiriak arautzen dituena).

   • Dudarik gabe egiaztatu baldin bada modu independentean ziurtatutako etxebizitzek, lokalek edo atalek dagoeneko ez dituztela betetzen eman zitzaien ziurtagiri independentea justifikatzen zuten baldintzak, eta, betiere, hala egiaztatu baldin bada egindako ikuskatzeen bidez, erregistroan aurkeztutako eguneratzeen bidez edo beste edozein arrazoi dela medio.

   • Edozein arrazoi dela eta, ziurtagiria jaso duen eraikina desagertu dela egiaztatu bada.

Igorritako agiri informatikoak irakurtzea eta izapidetzea onartuko da, baldin eta organo eskudunak onartuko formatuen arabera bidali badira.

Erabiltzaileek erregistroaren zerbitzuak iruzur egiteko baliatzen badituzte, energia-arloko eskumena duen zuzendaritzak ez du erantzukizunik izango. Alde horretatik, erabiltzaileen erantzukizun esklusiboa izango dira bai administrazio elektronikoaren zerbitzu horietan sartzean euren burua kautotzeko beharrezko diren elementuen zaintza, bai beharrezko den konexioaren ezarpena, bai sinadura elektronikoaren erabilera, bai eta horien guztien erabilera desegoki, oker eta arduragabearen ondorioak ere. Erabiltzaileen erantzukizuna izango da, orobat, erregistro elektronikoak hartu-agiri gisa bueltatzen dizkien fitxategiak egoki zaindu eta erabiltzea.

Baliabide elektronikoen bidezko jakinarazpenak https//www.euskadi.net egoitza elektronikoan egingo dira Administrazio Elektronikoari buruzko otsailaren 21eko 21/2012 Dekretuan ezarritakoarekin bat etorriz, eta, betiere, egintza administratiboen jakinarazpenetarako ezarritako baldintzak beteko dira.

1. Aurreko artikuluetan ezarritakoaz gain, interesdunek erregistroko informazioa ikus dezakete eta informazio horren oinarri diren agiriak eskuratu, agindu honetan ezarritako eran. Nolanahi ere, izaera pertsonaleko datuak babesteko bermeak bete beharko dira, arlo horretako legedian ezarrita dagoen eran.

2. Informazioa Interneteko web orrien bidez eskuratu ahal izango da, erregistroaren egoitza informatikoan, eta, orri horietan, gutxienez honako hauek jasoko dira:

   • Ziurtagiria jaso duen eraikin, etxebizitza, lokal edo eraikin-zatiaren identifikazioa.

   • Ziurtagiria eraikin-proiektu batena edo bukatutako eraikin batena den.

   • Ziurtagiria etxebizitza bati edo etxebizitzaz besteko erabilerak dituen lokal bati dagokion.

   • Indarrean den ziurtagirian adierazten den kalifikazio energetikoa, eraginkortasun energetikoaren eskalari jarraituz.

   • Eraginkortasun energetikoaren ziurtagiriaren indarraldia.

   • Lehendik emandako eraginkortasun energetikoaren beste ziurtagiri baten berritzea edo eguneratzea bada, hala zehaztuko da.

   • Lehendik emandako eta gerora eguneratutako edo berritutako ziurtagirien zerrenda, halakorik bada, bai eta horien kalifikazio energetikoak eta kanpoko kontroleko txostenen emaitzak ere.

3. Web orri horretan, halaber, erregistroan jasotako eraikin, etxebizitza, lokal edo eraikin-zatiei dagozkien idazpen, idatz-ohar eta agiriak bildu daitezke.

Agindu honetan ezarritako betebeharrak betetzen ez badira, zehapenak ezarri ahal izango dira, Euskal Autonomia Erkidegoko kontsumitzaile eta bezeroen Estatutuari buruzko 6/2003 Legearen 50. artikuluko 4., 5. eta 6. paragrafoetan eta azaroaren 22ko 240/2011 Dekretuaren 21. artikuluan ezarritakoarekin bat etorriz.